काठमाडौं । राष्ट्रिय प्रजातन्त्र पार्टी ९राप्रपा० का संसदीय दलका नेता ज्ञानेन्द्र शाहीले केरा किसानले भोगिरहेको मूल्य असमानताप्रति सरकारको ध्यानाकर्षण गराउँदै प्रधानमन्त्रीलाई खुलापत्र लेखेका छन्। उनले केराको बजार मूल्य र किसानले पाउने मूल्यबीचको ठूलो अन्तर अन्त्य गर्न तत्काल कदम चाल्न आग्रह गरेका छन्।
बजारमा केरा प्रतिदर्जन ३५० देखि ४०० रुपैयाँसम्म बिक्री भइरहँदा किसानले केवल ७० देखि ८५ रुपैयाँ मात्र पाउनु अत्यन्तै दुःखद अवस्था रहेको उनको भनाइ छ । उत्पादन गर्ने किसानले न्यूनतम लाभ पनि नपाउने र उपभोक्ताले महँगो तिर्नुपर्ने अवस्था अन्यायपूर्ण छ,’उनले लेखेका छन्। उनले यस समस्याको प्रमुख कारण बिचौलियाको अत्यधिक प्रभाव रहेको उल्लेख गरेका छन् ।
किसानहरू सिधै बजारसम्म पहुँच राख्न नसक्दा बिचौलियामा निर्भर हुन बाध्य भएको र उपभोक्ता तथा किसानहरु मारमा परेको उनले प्रधानमन्त्रीलाई जानकारी गराएका छन् । शाहीले यो समस्या केवल केरा बालीमा सीमित नभई समग्र कृषि प्रणालीकै कमजोरीको संकेत भएको बताएका छन्। ‘यदि यस्ता समस्या समाधान गरिएन भने किसानहरू कृषि पेशाबाट निरुत्साहित हुने र देशको खाद्य सुरक्षा नै सङ्कटमा पर्न सक्छ, ’ खुलापत्रमा भनिएको छ।
उनले सरकारसँग केराका बिचौलियामाथि कडा कारबाही गर्न, किसानलाई उचित मूल्य सुनिश्चित गर्न तथा कृषि बजार प्रणालीमा सुधार ल्याउन माग गरेका छन्। ‘किसानको पसिनाअनुसारको मूल्य सुनिश्चित गर्नु राज्यको दायित्व हो, ’ उनले जोड दिएका छन्। शाहीले अन्त्यमा यस गम्भीर विषयमा सरकार चाँडै संवेदनशील भई प्रभावकारी कदम चाल्ने विश्वास व्यक्त गरेका छन्।
