काठमाण्डौं । स्वास्थ्य तथा जनसंख्या मन्त्रालयले स्वास्थ्य सेवासम्बन्धी गुनासो सम्बोधन गर्न ‘हेल्लो हेल्थ सेवा’ सुरु गरेको छ । आमनागरिकको स्वास्थ्य सेवासम्बन्धी गुनासो सम्बोधन गर्नका लागि एकाइ स्थापना गरेर हेल्लो हेल्थ सुरु गरिएको हो ।
सेवा सुरु भएसँगै नागरिकले स्वास्थ्य मन्त्रालय तथा मातहतका निकाय र स्वास्थ्य सेवासँग सम्बन्धित गुनासोहरू टेलिफोन, ह्वाट्सएप, भाइबर, इमेल तथा हुलाकबाट समेत पठाउन सक्नेछन् ।
साथै टेलिफोन नम्बर १११५ मा फोन गरेर आफ्ना गुनासोहरू राख्न सकिनेछ भने भाइबर र ह्वाट्स एपमा ९८५१३३०५९२ नम्बरमा आफ्ना गुनासा सन्देशमार्फत पठाउन सकिने व्यवस्था गरिएको मन्त्रालयले जनाएको छ इमेलमार्फत ‘हेल्लो हेल्थएट एमओएचपी डट जिओभी डट एनपी’मा गुनासो पठाउन सकिने जनाइएको हो ।
सेवा सुरु गर्दै मन्त्री प्रदीप पौडेलले नागरिकलाई सरल र सहज स्वास्थ्य सेवामा पहुँच अभिवृद्धि गर्ने उद्देश्यले गुनासो एकाइ स्थापना गरेको बताएका छन् । यसअघि डा,अनुप बाँस्तोलाको संयोजकत्वमा गत मंसिर १४ गते एकाइ गठन गर्ने निर्णय गरेको थियो । सोही एकाइले हेल्लो हेल्थका लागि आवश्यक तयारी गरेर सेवा सुरु गरेको हो ।
मन्त्रालयले गठन गरेको समितिमा सूचना अधिकारी डा। भक्तबहादुर केसी, सूचना प्रविधि निर्देशक रमेशराज सुवेदी तथा शाखा अधिकृत गौरीप्रसाद आचार्य सदस्य छन् । यसअघि इपिडिमियोलोजी तथा रोग नियन्त्रण महाशाखा टेकुमा रहेको हटलाइन नम्बरमा अरू माध्यमसमेत थप गरेर गुनासो तथा सेवासम्बन्धी जानकारी लिने व्यवस्था मिलाइएको मन्त्रालयका प्रवक्ता डा,प्रकाश बुढाथोकीले बताएका हुन् ।