काठमाडौँ । पेट्रोल छर्केर आत्मदाहको प्रयासपछि उपचारका क्रममा मृत्यु भएका मुगुका गणेश नेपालीको परिवारले उनको शव बुझ्न अस्वीकार गरेको छ। गणेशका भतिज मन नेपालीले सरकारले उनका परिवार हेरचाहको जिम्मेवारी नलिँदासम्म आफूहरुले शव नबुझ्ने बताए। मन नेपालीले भने अन्टी पढ्दै छिन्। छोरी पनि सानै छ, ,उसैले काम गर्दै परिवार पालिरहेको थियो । सरकारले गणेशको श्रीमति र छोरीको जिम्मेवारी लिनुपर्छ। जिम्मेवारी नलिँदासम्म हामी शव बुझ्दैनौं।
सरकारले जिम्मेवारी लिन नमाने आन्दोलन गर्ने चेतावनी समेत उनले दिए। माइतीघर जानुपर्छ कि कहाँ जानुपर्छ हामी आन्दोलन गर्छौँ, नेपालीले भने। बिहीबार गणेशले गलत ठाउँमा पार्किङ गरेको भन्दै महानगर प्रहरीले आफ्नो बाइकमा ह्वील लक गरिदिएपछि गणेशले त्रिपुरेश्वरस्थित राहदानी विभागअगाडि पेट्रोल छर्केर आत्मदाहको प्रयास गरेका थिए। लगत्तै उनलाई वीर अस्पतालमा लगेर उपचार थालिएको थियो।
अस्पतालका अनुसार उनको शरीर करिब ५५ प्रतिशत जलेको थियो। शरीरको धेरै भाग जलेकाले उपचार कठिन बन्दै गएपछि गणेशको मृत्यु भएको अस्पतालले जनाएको छ। उनको पार्थिव शरीरलाई पोष्ट मार्टमका लागि वीर अस्पतालवाट त्रिबि शिक्षण अस्पताल लिने तयारी भईरहेको छ । अहिले वीर अस्पतालमा शुभचिन्तक र आफन्तहरुको बाक्लो भिड लागेको छ ।
