काठमाडौं । प्रमुख प्रतिपक्षी दल नेकपा ( माओवादी केन्द्र ) का सांसद तथा पूर्वमन्त्री शक्तिबहादुर बस्नेतले उखु किसानलाई अनुदान रकम सरकारले आजसम्म भुक्तानी नगरेकोमा आक्रोश पोखेका छन् । उनले वर्तमान सरकार उखु किसानका मागप्रति गम्भीर नबनेको पनि आरोप लगाए । आज ९शुक्रबार० को प्रतिनिधिसभाको बैठकमा बोल्दै उनले यस्तो बताएका हुन् ।
सांसद बस्नेतले उखु किसानले पाउनुपर्ने गत वर्षकै एक अर्ब ५० करोड भन्दा बढी रकम सरकारले भुक्तानी नगरेकोमा असन्तुष्टि पोखेका हुन् । उनले वर्तमान सरकारलाई किसानविरोधी सरकारको संज्ञा दिए । उनले भने,‘आत्मनिर्भर अर्थतन्त्र, गरिबी निवारण र सामाजिक न्यायका एजेण्डा आजका राष्ट्रिय महत्वको आवश्यकता हुन् । विडम्बना, गतवर्ष उखु किसानले भुक्तानी पाउनुपर्ने करिब एक अर्ब ५० करोडभन्दा बढि अनुदान रकम आजसम्म भुक्तानी पाउन सकेका छैनन् । किसानले पाउँदै आएको प्रति क्विन्टल रु ७० को अनुदान रकम घटाएर रु ३५ बनाउने काम गरेको छ ।
सरकारको यो जनविरोधी रवैयाविरुद्ध किसानहरू विगत केहीदिन देखि वर्षा र तीज लगायतका पर्वको प्रवाह नगरी सडकमा धर्ना र प्रदर्शन गरिरहेका छन्, तर सरकार उनीहरूको आवाज र मागप्रति गम्भीर देखिँदैन ।’ बस्नेतले किसानले पाउनुपर्ने गतवर्षको बाँकी भुक्तानी तत्काल गर्न भुक्तानी गर्न र अनुदान रकम प्रति क्विन्टल ७० रुपैयाँ नै यथावत राख्न जोडदार माग गरे ।
