काठमाडौं । जम्मू–कश्मीरको पहलगाममा भएको आतङ्कवादी हमलापछि भारतका प्रधानमन्त्री नरेन्द्र मोदी आफ्नो साउदी अरेबिया भ्रमण छोट्याएर स्वदेश फर्किएका छन् । उनी बुधबार बिहान राजधानी नयाँ दिल्ली फर्किएका हुन् । प्रधानमन्त्री मोदी मङ्गलबार साउदी अरबको दुई दिने भ्रमणका लागि त्यसतर्फ प्रस्थान गरेका छन् ।
स्वदेश फर्किएलगत्तै उनले पहलगाममा आतङ्कवादी आक्रमणका लागि जिम्मेवार व्यक्तिहरूलाई नछोड्ने प्रतिबद्धता जनाएका छन् । ‘आक्रमणका लागि जिम्मेवार व्यक्तिहरूलाई छोडिने छैन,’ उनले भने । दिल्ली पुग्नेबित्तिकै मोदीले परिस्थितिको बारेमा जानकारी लिन आपतकालीन ब्रिफिङ बैठक गरेका छन् ।
समाचार एजेन्सी एएनआईका अनुसार राष्ट्रिय सुरक्षा सल्लाहकार अजित डोभालसँग यस परिस्थितिबारे छलफल गरिएको छ । केन्द्रीय गृहमन्त्री अमित शाह पहिले नै कश्मीर पुगिसकेका छन् । यसैबीच समाचार एजेन्सी पीटीआईका अनुसार मङ्गलबार पहलगाममा भएको आतंकवादी हमलापछि दिल्लीमा सुरक्षा व्यवस्था कडा पारिएको छ । अधिकारीहरूले यो कदम सावधानीका रूपमा उठाइएको बताएका छन् ।
मङ्गलबार जम्मू कश्मीरको पहलगाममा पर्यटकहरूमाथि आतङ्कवादी आक्रमण भएको छ । यस आक्रमणमा अतिवादीहरूले पर्यटकहरूमाथि गोली चलाएका थिए, जसमा कम्तीमा २८ जनाको मृत्यु भएको थियो । आक्रमणपछि दिल्ली प्रहरीले सहरभर सुरक्षा व्यवस्था बढाएको छ । कुनै पनि शङ्कास्पद गतिविधि तुरुन्तै पत्ता लगाउन सकियोस् भनेर विशेषगरी पर्यटकीय स्थल र सहरको सीमानामा कडा जाँच र निगरानी भइरहेको छ ।
अर्कोतर्फ, उपत्यकाका सुरक्षाकर्मीहरूले विभिन्न स्थानमा सवारीसाधन जाँच गरिरहेका छन् र सडकहरूमा व्यापक अवरोध गरिएको छ । जम्मू–कश्मीरका धेरै क्षेत्रबाट आक्रमणको विरोधमा भएका विरोधका तस्वीर र भिडिओ पनि बाहिर आइरहेका छन् । पहलगामका केही मानिसले पनि मैनबत्ती मार्च गर्दै आक्रमणप्रति आक्रोश व्यक्त गरेका छन् । एएनआई
