अमेरिका । अमेरिकाको लस एन्जलसमा मंगलबार सुरु भएको आगलागीको असर बढी रहेको छ। हालसम्म आगलागीमा परी कम्तीमा ११ जनाले ज्यान गुमाईसकेका छन् भने १० हजार घर तथा संरचना ध्वस्त भएका छन्। क्यालिफोर्नियामा पानीको समेत अभाव देखिएको छ। त्यहाँका गर्भनरले यसको छानबिनको आवाज उठाएका छन्। अहिले प्रभावित क्षेत्रमा रात्रि कालिन कर्फ्यु लगाइएको छ।
पालिसेड र इटनमा यो नियम कडाइका साथ लागु हुने जनाइएको छ। राष्ट्रपति जो बाइडेले लस एन्जलसको अवस्था साँच्चै भयावह भएको बताउँदै मर्नेको सङ्ख्या अझ बढ्न सक्ने बताएका छन्। अहिले अल्टाडेना जिल्लामा १५ सय अग्नि नियन्त्रक सक्रिय छन्। त्यहाँका प्राय सबै मानिस अन्यत्र सरिसकेका छन्। क्यालिफोर्नियाका गभर्नर गेभिन न्युसमले डोनाल्ड ट्रम्पलाई भ्रमण गर्नका लागि त्यहाँ बोलाएका छन्। उनले ट्रम्पलाई घटनालाई राजनीतिकरण नगर्न भने अनुरोध गरेका छन्। अहिले पालिसेड र इटनमा आगोमा प्रभाव कम भएको छ। तर त्यहाँका सिनेटरले घरमा तत्काल नफर्कन अनुरोध गरेका छन्। उनीहरूले घर फर्कने अवस्था आउनका लागि केही दिन अझ लाग्न सक्ने बताएका छन्।
आगो १७ हजार एकड भन्दा बढी क्षेत्रमा फैलिएको अधिकारीहरुले बताएका छन् । हलिउड हिल्स पनि डढेलोको चपेटामा परेको छ । कयौं फिल्म स्टारहरुको घर पनि आगोमा जलेको छ ।अमेरिकाको लसएन्जलसमा डढेलो बस्तीमा पसेर विपत्ती परेका बेला लुटपाटका घटना बढेका छन् । लुटपाटमा संलग्न २० जनालाई प्रहरीले पक्राउ गरेको छ । यो डढेलोलाई क्यालिफोर्नियाको इतिहासकै सबैभन्दा विनाशकारी भनिएको छ ।
