काठमाडौं। नेपाली कांग्रेसले निवर्तमान प्रधानमन्त्री केपी शर्मा ओली, निवर्तमान गृहमन्त्री रमेश लेखक सहितका व्यक्तिहरूको राहदानी रोक्का गर्ने सरकारको निर्णयप्रति आपत्ति जनाएको छ। कांग्रेसका पार्टी कार्यालयका मुख्यसचिव कृष्णप्रसाद पौडेलले प्रेस वक्तव्य निकालेर सरकारले राहदानी रोक्का गर्ने र आफ्नै मुलुकभित्र पनि आवतजावत गर्न निषेध गर्ने किसिमका राजनैतिक प्रतिशोधपूर्ण निर्णय गर्न थालेको भनेर विरोध जनाएको हो।
गत भदौ २३ र २४ गते जेनजी आन्दोलन भएको थियो। उक्त आन्दोलनपछि आन्दोलनका क्रममा भएका घटनासम्बन्धी जाँचबुझ आयोग गठन भएको छ। उक्त आयोगको सिफारिसमा सरकारले निवर्तमान प्रधानमन्त्री ओली र निवर्तमान गृहमन्त्री लेखकसहित पाँच जनाको राहदानी रोक्का गर्ने निर्णय गरेको छ।
गृह मन्त्रालयका पूर्वसचिव गोकर्णमणि दुवाडी, राष्ट्रिय अनुसन्धानका पूर्वप्रमुख हुतराज थापा र जिल्ला प्रशासन कार्यालय काठमाडौंका पूर्वप्रमुख ९सीडीओ० छवि रिजालको पासपोर्ट पनि रोक्का गर्ने निर्णय भएको छ। पीडितलाई आतङ्कित गर्ने र सप्रमाण भेटिएका अपराधिलाई उन्मुक्ति दिँदै जाने सरकारको नीति जनताका लागि कदापि स्वीकार्य नहुने कांग्रेसले विज्ञप्तिमार्फत जनाएको छ ।
मुख्यसचिव कृष्ण पौडेलले जारी गरेको विज्ञप्तिमा घटनाको छानबिन प्रारम्भ नहुँदै पूर्वाग्रही ढंगले नेता र व्यक्तिहरूको राहदानी रोक्का गर्ने र आफ्नै देशमा पनि आवतजावत गर्न निषेध गर्ने कार्य प्रतिशोधपूर्ण रहेको बताइएको छ ।
