काठमाडौं । विश्व बैंकले नेपालमा वायु प्रदूषण घटाउन तथा वायु गुणस्तर सुधारका निम्ति ७ अर्ब ७ करोड २० लाख ऋण अनुमोदन गरेको छ। वायु प्रदूषणको जोखिम उच्च जोखिम भएका काठमाडौं उपत्यकाका साथै तराइका केही भागमा ‘नेपाल क्लिन एयर एण्ड प्रस्पेरिटी प्रजेक्ट’ सञ्चालन गर्न उक्त रकम अनुमोदन गरिएको वाशिङ्टनडिसीस्थित विश्व बैंकको प्रधान कार्यालयले जनाएको छ ।
परियोजना अन्तर्गत करिब ४०० औद्योगिक र व्यावसायिक उद्यमलाई धुँवारहित बनाइने छ । विज्ञहरूले सर्वसाधारणलाई मास्कको प्रयोग गर्न, अत्यावश्यक कामबाहेक घरबाहिर ननिस्कन र बिहानको समयमा घर बाहिर गरिने व्यायामहरू कम गर्न सुझाव दिएका छन्। यस प्रदूषणको मुख्य कारणका रूपमा लामो समयदेखि वर्षा नहुनु, सवारी साधनको धुवाँ, निर्माण कार्यबाट निस्कने धूलोलगायतलाई मानिएको छ।
उद्योग, वाणिज्य तथा आपूर्ति मन्त्रालयअन्तर्गत उद्योग विभाग र वन तथा वातावरण मन्त्रालयका साथै वातावरण विभागमार्फत परियोजना कार्यान्वयन गरिने बैंकले आज जारी गरेको प्रेस विज्ञप्तिमा जनाइएको छ ।
