काठमाडौँ । नेपाली कांग्रेसका नेता डा। शेखर कोइरालाले पार्टीलाई एकतावद्ध राख्ने प्रयास सफल हुन नसकेको बताएका छन् । उनले दोष–निर्दोषको बहसमा नलागी यस विषयको वस्तुपरक समीक्षा इतिहासले गर्ने बताएका छन् ।
बिहीबार एक विज्ञप्ति जारी गर्दै डा. कोइरालाले कांग्रेस एक भएर आसन्न निर्वाचनमा जान सबैको इमानदार प्रयास रहे पनि त्यसो हुन नसकेको उल्लेख गरेका छन् । पार्टीभित्र देखिएका र नदेखिएका अन्तरविरोध र विभिन्न षडयन्त्रका कारण कांग्रेस कमजोर भएको उनको भनाइ छ ।डा. कोइरालाले यस कठिन घडीमा बीपी कोइरालाको स्मरण गर्नुपर्ने बताउँदै कांग्रेस एकढिक्का भएर अगाडि बढ्न नसक्नु नियतिको कठोर सत्य भएको टिप्पणी गरेका छन् ।
उनले आठ दशक लामो कांग्रेस इतिहासको गौरव जोगाउन संगठनात्मक उर्जा एकतावद्ध हुनुपर्नेमा जोड दिए । पार्टीभित्र आवश्यक सुधारका प्रक्रिया जारी रहने उल्लेख गर्दै डा। कोइरालाले सबै कार्यकर्तालाई ‘घर फर्कन, कांग्रेसमा फर्कन’ आह्वान समेत गरेका छन् ।
