राष्ट्रिय खेलकुद परिषद् (राखेप) ले सदस्य–सचिव टंकलाल घिसिङलाई शुक्रबार विशेष कार्यक्रममार्फत बिदाइ गरेको छ। २०७८ मंसिर १३ गते नियुक्त भएका घिसिङले आफ्नो चार वर्षे कार्यकाल पूरा गरेपछि औपचारिक रूपमा बिदाइ पाएका हुन्। सो कार्यक्रममा राखेप बोर्ड सदस्य अन्जन धमला, विना श्रेष्ठ, दिपेन्द्र विष्ट, जनक बर्तौला, मोहम्मद फाजिल र प्रकाशकुमार कुसरीलाई पनि बिदाइ गरिएको थियो। त्यस्तै, मिसन–२०२६ अन्तर्गत रहेका खेलाडी तथा प्रशिक्षकहरूलाई किट्स वितरण गरिएको थियो।
सदस्य–सचिव घिसिङलाई राखेप कर्मचारी संघ, नेपाल राष्ट्रिय तथा अन्तर्राष्ट्रिय खेलाडी संघ र विभिन्न राष्ट्रिय खेल संघहरूले प्रशंसा पत्र प्रदान गरे। घिसिङले आफ्नो चार वर्षे कार्यकालमा प्राप्त उपलब्धिमा सहयोग गर्ने सबै खेलाडीप्रति धन्यवाद व्यक्त गरे।
यसअघि नै युवा तथा खेलकुद मन्त्रालयले पनि घिसिङलाई बिदाइ गरेको थियो। राखेपका अध्यक्ष तथा युवा–खेलकुद मन्त्री बब्लु गुप्ता र सचिव डा. हरिप्रसाद लम्सालले उनलाई मायाको चिनो हस्तान्तरण गर्दै बिदाइ गरेका थिए। सो अवसरमा घिसिङले आफ्नो चार वर्षे कार्यकालको प्रतिवेदन तथा राखेपले प्रकाशन गरेको पुस्तकसमेत हस्तान्तरण गरेका थिए।
