काठमाडौँ । नेपाली कांग्रेसका कार्यवाहक सभापति पूर्णबहादुर खड्काले प्रयास गर्दा पनि महाधिवेशनसम्बन्धी विवाद समाधान हुन सकेन।सभापति शेरबहादुर देउवाले असोज २८ गते केन्द्रीय कार्यसमिति बैठक सुरु गर्दै खड्कालाई कार्यवाहक सभापतिको जिम्मेवारी दिएका थिए, तर त्यसपछि उत्पन्न विवाद खड्काले निभाउन खोजेको भूमिकाबाट पनि टुंगो लागेन ।
बिहीबार भने देउवा आफैले दुवै पक्षलाई भेटेर विवाद मिलाउने प्रयास गरे । उनले दिउँसो संस्थापन पक्षका नेता विमलेन्द्र निधि, गोपालमान श्रेष्ठ, विजयकुमार गच्छदार, प्रकाशमान सिंह, डा. शशांक कोइराला, कृष्णप्रसाद सिटौला, डा. प्रकाशशरण महत, बालकृष्ण खाण, एनपी साउद, रमेश लेखक, मीन विश्वकर्मासँग लामो छलफल गरे ।
त्यसपछि उनले साँझ कार्यवाहक सभापति खड्का, महामन्त्री गगन थापा र विश्वप्रकाश शर्मा तथा लेखकसँग पनि भेटघाट गरे । तर देउवाको प्रयासबाट पनि विवाद समाधान भएन । थापा–शर्मा विशेष महाधिवेशनमा अडिग रहे भने देउवा विशेष महाधिवेशनका लागि तयार भएनन् । महामन्त्रीद्वयले आफूहरूले तोकेको समयमा संस्थापन पक्षले नियमित महाधिवेशन हुन दिनेमा पनि विश्वास व्यक्त गरेनन् ।
देउवाले दुवै बैठकमा विशेष महाधिवेशनले पार्टी फुट्न सक्ने भन्दै सावधानी अपनाउन नेताहरूलाई सचेत गराए । ‘पार्टी फुटेको हेर्न सक्दिनँ,’ देउवाको भनाइ उद्धृत गर्दै एक नेताले भने, ‘सल्लाह–सम्बाद गरेर अगाडि बढौँ, गर्न त नियमित महाधिवेशन नै गरौँ ।’ देउवाले संस्थापन पक्षलाई निर्वाचनभन्दा अघि महाधिवेशन गर्न नहुने अडान छाड्न भने । त्यस्तै, महामन्त्रीद्वयलाई भने पार्टीलाई एकताबद्ध बनाउने गरी महाधिवेशनको वातावरण तयार गर्न सुझाव दिए ।
महामन्त्री थापाले देउवासँगको भेटमा विधानले व्यवस्था गरेअनुसार महाधिवेशन प्रतिनिधिले माग गरेको विशेष महाधिवेशनमा जानैपर्ने आफ्नो धारणा राखे । तर देउवाले त्यसलाई स्पष्ट अस्वीकार गरे । त्यसपछि थापाले सभापतिबाटै विशेष महाधिवेशन बोलाए सर्वसम्मति बन्ने बताउँदै आग्रह गरे तर देउवाले यसबारे थप सल्लाह आवश्यक रहेको मात्र उल्लेख गरे ।
थापाले यसअघि केन्द्रीय बैठकमा मंसिर २७ गते विशेष महाधिवेशन गर्ने प्रस्ताव पनि राखिसकेका छन् । असोज २९ गते २,४८८ महाधिवेशन प्रतिनिधिले विशेष महाधिवेशन माग्दै कार्यवाहक सभापति खड्कालाई हस्ताक्षर बुझाएका थिए । संस्थापन पक्षका विमलेन्द्र निधि, कृष्णप्रसाद सिटौला, डा. शशांक कोइराला र डा. प्रकाशशरण महतलगायत नेताहरू भने विशेष महाधिवेशन कुनै हालतमा गर्नु नहुने अडानमा छन् ।
वैकल्पिक रुपमा महामन्त्रीद्वयले फागुन २१ गतेका लागि तोकिएको प्रतिनिधिसभा निर्वाचनअघि नियमित १५औँ महाधिवेशन गर्ने प्रस्ताव राखेका छन् । यसमा संस्थापन पक्ष केही खुला देखिए पनि महामन्त्रीद्वय अझै पनि उनीहरू चुनावअघि महाधिवेशन गर्नै तयार हुन्छन् भन्नेमा विश्वस्त हुन सकेका छैनन् ।
बिहीबारको छलफलमै उनले यो शंका दोहोर्याएका थिए । देउवासँगको भेटमा महामन्त्री शर्माले नियमित महाधिवेशनको ग्यारेन्टी मागेर विशेष नगर्ने प्रस्ताव उचित नभएको बताए । ‘नियमित महाधिवेशनको स्पष्ट क्यालेन्डर आवश्यक छ, अब विशेषबाहेक अरु विकल्प छैन,’ शर्माले भने ।सम्झौता नहुँदा शुक्रबार बोलाइएको केन्द्रीय समितिको बैठक आइतबारसम्म सारियो । बिहीबार संस्थापन पक्षले नियमित महाधिवेशनको क्यालेन्डर ल्याउने, क्यालेन्डर आएपछि विशेष महाधिवेशनको निवेदन फिर्ता नलिने तर विशेष महाधिवेशन हुँदैन भन्ने आश्वासन चाहिने प्रस्ताव राखेको थियो तर महामन्त्रीद्वयले यो प्रस्ताव अस्वीकार गरेको स्रोतले बताएको छ ।
