काठमाण्डौं । नेपाल र भारतका सीमा सुरक्षा बलबीच हुने नवौँ समन्वयात्मक बैठकमा सहभागी हुन सशस्त्र प्रहरी महानिरीक्षक राजु अर्याल आज ९मंगलबार० भारतको नयाँ दिल्ली प्रस्थान गरेका छन्। उनको नेतृत्वमा रहेको उच्चस्तरीय नेपाली प्रतिनिधिमण्डलले भारतीय समकक्षी सशस्त्र सीमा बल ९एसएसबी० सँग सीमा सुरक्षाका विविध आयामबारे छलफल गर्नेछ।
महानिरीक्षक अर्याललाई त्रिभुवन अन्तर्राष्ट्रिय विमानस्थलमा सशस्त्र प्रहरी अतिरिक्त महानिरीक्षक नारायणदत्त पौडेल लगायत वरिष्ठ अधिकारीहरूले बिदाइ गरेका थिए। प्रतिनिधिमण्डलमा सशस्त्र प्रहरीका सीमा सुरक्षा विभाग प्रमुख गणेशबहादुर ठाडा मगर, प्रहरी नायव महानिरीक्षक दीपक रेग्मी, राष्ट्रिय अनुसन्धान विभागका अनुसन्धान निर्देशक रामप्रसाद दास, गृह मन्त्रालयका उपसचिव रविन्द्र आचार्य, परराष्ट्र मन्त्रालयका उपसचिव विजयराज तन्डुकार लगायतका अधिकारीहरू सहभागी हुनेछन्।
कार्तिक २६ देखि २८ गतेसम्म नयाँ दिल्लीमा आयोजना हुने उक्त बैठकमा सीमा अपराध, लागुऔषध ओसारपसार, अवैध चोरी निकासी तथा पैठारी नियन्त्रण जस्ता विषयमा छलफल केन्द्रित हुने सशस्त्र प्रहरी बल नेपालले जनाएको छ। दुई देशका सुरक्षा निकायबीच सूचनाको प्रभावकारी आदानप्रदान र आपसी समन्वयलाई थप सुदृढ बनाउँदै सीमा सुरक्षालाई थप मजबुत बनाउने विषयमा पनि छलफल हुनेछ।
नेपाल र भारतबीच नियमित रूपमा हुँदै आएको यस्तो समन्वयात्मक बैठकले सीमा क्षेत्रमा शान्ति, सुरक्षा र आपसी सहकार्य अभिवृद्धि गर्न महत्त्वपूर्ण भूमिका खेल्ने विश्वास लिइएको छ। महानिरीक्षक अर्यालको अनुपस्थितिमा सशस्त्र प्रहरी अतिरिक्त महानिरीक्षक नारायणदत्त पौडेलले निमित्त महानिरीक्षकको जिम्मेवारी सम्हाल्ने सशस्त्र प्रहरी बलका सह(प्रवक्ता, डीएसपी शैलेन्द्र थापाले जानकारी दिए।
