काठमाडौं । भारत भ्रमणमा रहेको नेपाल ए क्रिकेट टोलीले आज असम क्रिकेट एसोसिएसनसँग चौथो टी–ट्वेन्टी खेल्दैछ। चौथो खेल पनि डे–नाइट मोडलमा हुँदैछ। नेपाल ए र असमबीचको खेल असम क्रिकेट एसोसिएसन एसीए स्टेडियम गुवाहटीमा साँझ ५ बजे सुरु हुनेछ। पाँच खेलको टी–ट्वेन्टीमा नेपालले २–१ अंकको अग्रता लिएको छ। पहिलो खेलमा पराजित भएको नेपाल एले त्यसपछिका दुई खेलमा लगातार जित निकालेको हो।
शनिबार तेस्रो खेलमा नेपाल एले ९ रनको जित निकाल्यो। टस हारेर पहिले ब्याटिङ गरेको नेपालले पूरै २० ओभरमा ६ विकेट गुमाएर १ सय ९६ रन जोडेको थियो। जसमा सन्दीप जोराले ४८ बलमा ७४ रनको अर्धशतकीय इनिङ्स खेले। जवाफी ब्याटिङमा आएको असम पूरै ओभरमा १ सय ८७ रनमा अलआउट भयो।
नेपाल एले भोलि अन्तिम खेल पनि डे–नाइट मोडलमै खेल्ने नेपाल क्रिकेट एसोसिएसन क्यानले जनाएको छ। नेपाल ए राष्ट्रिय क्रिकेट टोलीको व्याकअप टोली हो। सन्दीप जोराको सानादर ब्याटिङसँगै नेपाल ‘ए’ ले आसाम प्रदेश क्रिकेट संघसँगको अभ्यास खेलमा लगातार दोस्रो जित हात पारेको थियो ।
