काठमाडौं । प्रतिपक्षी दलहरु राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा) ले प्रधानमन्त्री केपी शर्मा ओलीको सम्बोधनलाई बहिष्कार गर्ने भएका छन् । प्रधानमन्त्री ओलीले आज १ बजेको प्रतिनिधिसभा बैठकमा सम्बोधन गर्ने कार्यसूची रहेको छ ।
भिजिट भिसा प्रकरणमा गृहमन्त्री रमेश लेखकको राजीनामा र उच्चस्तरीय समितिको माग गर्दै आन्दोलनरत रास्वपा र राप्रपाले आज पनि आफ्नो विरोध जारी राख्ने भएको हो । रास्वपाका प्रवक्ता मनिष झाले अफूहरुको आन्दोलन जारी रहने बताए । ‘हाम्रो आन्दोलन निरन्तर छ, आज पनि रहन्छ ।
हामी प्रधानमन्त्रीको सम्बोधन सुनेर बस्दैनौं ।’ त्यस्तै, राप्रपाका उपाध्यक्ष ध्रुवबहादुर प्रधानले पनि प्रधानमन्त्रीको सम्बोधन बहिष्कार गरिने बताए । प्रधानमन्त्री ओलीले चीन भ्रमणमा जानुपूर्व प्रतिनिधिसभा बैठकलाई सम्बोधन गर्न लागेका हुन् । साङघाई सहयोग संगठन (एससीओ) शिखर सम्मेलनमा भाग लिन चिनियाँ राष्ट्रपति सी चिनफिङको मैत्रीपूर्ण निमन्त्रणमा प्रधानमन्त्री ओली शनिबार (भोलि) चीन प्रस्थान गर्नेछन् । चीन भ्रमणलगत्तै ओलीको भारत भ्रमण पनि तय भएको बताइएको छ ।
