नेपालगञ्ज । नेपालगञ्ज उपमहानगरपालिकाको बसपार्कमा आज प्रहरीले गोली प्रहार गरी लागुऔषध खैरो हेरोइन कारोबारमा संलग्न चार जनालाई पक्राउ गरेको छ। लागुऔषध कारोबारमा संलग्न रहेका दुई जनालाई सुरुमा पक्राउ गरिएको र दुई जनाले प्रहरीमाथि ढुङ्गामुढा गरेर भाग्न खोज्दा उनीहरूमाथि दुई राउन्ड गोली प्रहार गरिएको जिल्ला प्रहरी कार्यालय, बाँकेका प्रहरी उपरीक्षक रामबहादुर घर्तीले जानकारी दिए।
‘लागुऔषधको कारोबार भइरहेको भन्ने सूचनाका आधारमा दुई जनालाई पछ्याएका थियौँ तर त्यहाँ चार जना रहेछन्,’ उनले भने। दुई जनालाई प्रहरीले पक्राउ गरेपछि बाँकी दुई जनाले प्रहरीमाथि ढुङ्गामुढा गरेर भाग्न खोजेपछि बाध्य भएर प्रहरीले गोली चलाएको प्रहरी उपरीक्षक घर्तीले बताए।
प्रहरीले नेपालगञ्ज उपमहानगरपालिका–५ का २२ वर्षीय अमन साह, सोही ठाउँ बस्ने २६ वर्षीय भाइजन अन्सारी, भारतको बहराइच रुपैडियाका २० वर्षीय अजयकुमार र २० वर्षीय कार्तिक कुमारलाई पक्राउ गरेको हो।
प्रहरीले कार्तिक कुमारको खुट्टामा गोली लागेको जनाएको छ। उनको दायाँ खुट्टामा गोली लागेको छ। लागुऔषध कारोबारीले प्रहार गरेको इँटा लागेर एक जना प्रहरी घाइते भएका छन्। घाइते प्रहरीलाई उपचारका लागि स्थानीय अस्पताल पठाइएको जिल्ला प्रहरी कार्यालय, बाँकेले जनाएको छ। रासस
