वीरगञ्ज । अस्पतालको अति संवेदनशील स्थान ‘आईसीयू’ र ‘सीसीयू’ कक्षमा आकस्मिक रूपमा विद्युत् सेवा अवरुद्ध हुँदा के होला रु बिरामीको ज्यान जान पनि सक्ला । तर, नारायणी अस्पतालको आईसीयू र सीसीयू कक्षमा करिब दुई घण्टा ३० मिनेट विद्युत् सेवा अवरुद्ध हुँदा कुनै पनि बिरामीको अकालमा ज्यान गएन ।
अस्पतालको सो कक्षमा शुक्रबार राति साढे १० बजेदेखि शनिबार बिहान १ बजेसम्म विद्युत् सेवा आपूर्ति अवरुद्ध भएको थियो । अस्पताल प्रशासन तथा व्यवस्थापनले समयमा ध्यान नदिँदा विद्युत् सेवा अवरुद्ध भएको जनाइएको छ । उक्त समयमा अस्पतालको आईसीयू र सीसीयू शय्यामा १७ जना बिरामी उपचारत थिए ।
चिकित्सक र नर्सिङ स्टाफले आवश्यक समन्वय र सावधानी अपनाउँदा ती बिरामी जोगिएका थिए । विद्युत् अवरुद्ध भएपछि हुँदा चिकित्सक र नर्सले मोबाइलबाट ‘लाइट’ बालेर उपचार गरेका थिए । यसैबीच, जिल्ला प्रशासन कार्यालयले नारायणी अस्पतालको आईसीयू र सीसीयू जस्तो संवेदनशील कक्षमा शुक्रबार राति विद्युत् आपूर्ति अवरुद्ध भएको घटनालाई गम्भीरतापूर्वक चासो लिएको छ ।
प्रशासनले विद्युत् आपूर्तिमा हेलचेक्र्याइँ गर्ने सम्बन्धित कर्मचारीलाई आन्तरिक छानबिन गरेर आवश्यक कारबाही गर्न निर्देशन दिएको छ । प्रमुख जिल्ला अधिकारी गणेश अर्याल र पर्साका प्रहरी प्रमुख गौतम मिश्रले नारायणी अस्पताल विकास समितिका अध्यक्ष, निमित्त मेडिकल सुपरिटेन्डडेन्ट, प्रशासन प्रमुख, अस्पतालका विभिन्न विभाग तथा कक्षमा कार्यरत चिकित्सक, नर्सिङ विभागमा कार्यरत नर्सिङ स्टाफ, इलेक्टिसियनलगायत अस्पतालसँग जोडिएका सबै निकायका पदाधिकारी तथा कर्मचारीको संयुक्त बैठक राखेर अस्पतालजस्तो संवेदनशील क्षेत्रमा गम्भीर हुनका लागि कडा निर्देशन दिएका हुन् ।
अस्पतालको आईसीयू र सीसीयूजस्तो संवेदनशील ठाउँमा साढे दुई घण्टा विद्युत् अवरुद्ध हुनु निकै गम्भीर विषय होु, प्रजिअ अर्यालले भने, तपाईँहरूका कारणले कुनै बिरामीको ज्यान जोखिममा परेको भए जिम्मेवारी लिने कसले हो । हिजोको विषम घटनाबाट पाठ सिक्दै आगामी दिनमा यस्ता खालका कुनै पनि गल्ती र कमजोरी नदोहोर्याउन निर्देश गर्दछु । जनताको स्वास्थ्यजस्तो कुरामा कसैले पनि खेलवाड गर्न पाइँदैन ।
प्रहरी प्रमुख मिश्रले अस्पताल प्रशासनले इलेक्टिसियनलगायतका कर्मचारीलाई २४सैँ घण्टा ड्युटीमा खटाउनका लागि पनि अनुरोध गरे । नारायणी अस्पताल विकास समितिका अध्यक्ष धिरजकुमार गुप्ताले शुक्रबार राति भएको घटना गम्भीर प्रकृतिको भएकाले आगामी दिनमा त्यस्ता खालका घटना दोहोरिन नदिने प्रतिबद्धता जनाएका छन् । अस्पतालका निमित्त मेडिकल सुपरिटेन्डेन्ट चित्ररञ्जन साहले आईसीयू र सीसीयू कक्षमा कमजोर प्रकृतिको वायरिङको कारणले विद्युत् आपूर्ति अवरुद्ध भएको बताए । अस्पताल प्रशासनले आईसीयूमा भएका दुई जना सिकिस्त प्रकृतिका बिरामीलाई अर्को अस्पतालमा पठाउने तयारी गर्दागर्दै विद्युत् आएसँगै पठाउन परेन, उनले भने । रासस
