रूपन्देही । रूपन्देहीको रोहिणी गाउँपालिकाले आइतबारदेखि अनिवार्य विद्यालय सञ्चालन गर्न निर्देशन दिएको छ । विद्यालय सञ्चालन नभए शिक्षक र कर्मचारीलाई कारबाही गर्ने पालिकाले चेतावनी दिएको छ । पालिकाभित्रका सबै सरकारी विद्यालयका शिक्षक र कर्मचारीलाई २०८२ वैशाख १४ गतेदेखि विद्यालयमा अनिवार्य उपस्थित हुन सूचनामार्फत निर्देशन दिइएको हो ।
गाउँपालिकाका अध्यक्ष विद्याप्रसाद यादवले १४ गतेदेखि शिक्षकलाई अनिवार्य रुपमा उपस्थिति भई नतिजा प्रकाशन, विद्यार्थी भर्ना, पाठ्यपुस्तक वितरण लगायत कार्यसहित नियमित रुपमा पठनपाठन अगाडि बढाउन निर्देशित गरिएको बताए । ‘निर्देशनको अवज्ञा गर्ने शिक्षक, कर्मचारीलाई क्षेत्राधिकारभित्र रही आवश्यक कारबाही प्रक्रिया अगाडि बढाउने छौं,’ उनले भने, ‘बालबालिकाको भविष्य र अभिभावकको अनुरोधलाई बेवास्ता गर्न सक्ने अवस्था छैन ।’
आइतबार शिक्षक र कर्मचारी विद्यालयमा उपस्थित नभए अर्को कदम चालिने उनले बताए । नेपाल शिक्षक महासंघको नेतृत्वमा गत चैत २० गतेदेखि शिक्षक, कर्मचारी निरन्तर आन्दोलनमा छन् । लामो समयको आन्दोलनले गर्दा विद्यालयमा अध्ययनरत बालबालिकाको शैक्षिक भविष्यमा प्रत्यक्ष प्रतिकूल प्रभाव परिरहेको पालिकाले जनाएको छ ।
