धुलिखेल । हिजो परेको अबिरल बर्षा र त्यस पछि आएको बाढीका कारण अवरुद्ध रहेको बिपी राजमार्ग १६ घण्टापछि पुनः सञ्चालनमा आएको छ। सोमवार रोशी खोलामा आएको बाढीले काभ्रेपलाञ्चोकको रोशी गाउँपालिका–१२ माम्तीमा डाइभर्सन बगाएपछि बिपी राजमार्ग अवरुद्ध भएको थियो।
सडक खुलेसँगै आज दिउँसोदेखि यातायातका सम्पूर्ण साधन दुईतर्फी चल्न थालेको प्रहरी नायव उपरीक्षक मिनबहादुर घलेले जानकारी दिए। रोशी खोलामा बाढी आएपछि सोमवार रातीदेखि सडक अवरुद्ध भएको हो। सडक डिभिजन कार्यालय भक्तपुरको पहलमा प्रहरी र स्थानीयको सहयोगमा अवरुद्ध सडक खुलाइएको सडक डिभिजन कार्यालय भक्तपुरका कर्मचारी चन्द्रबहादुर लामाले बताए।
यसअघि गत वर्ष असोज १० देखि १२ गतेसम्म रोशी खोलामा आएको बाढीले बिपी राजमार्गको विभिन्न ठाउँमा क्षति पुगेको थियो। त्यसपछि सडक डिभिजन कार्यालयले खोलाको किनारै किनार भएर अस्थायी डाइभर्सन बनाएर यातायात सञ्चालन गरेको थियो।
