काठमाडौँ । सरकार र शिक्षक महासंघबीच भएको सहमतिप्रति असहमति जनाउँदै राहत शिक्षकहरूले छुट्टै राष्ट्रिय समिति गठन गरेका छन्। हालै महोत्तरीको बर्दिबास भएको भेलाले विष्णु खत्रीको अध्यक्षमा २९ सदस्यीय नयाँ नेपाल राहत शिक्षक राष्ट्रिय समिति गठन गरेका हो।
बुधबार संवाद डबलीमा पत्रकार सम्मेलनमा बोल्दै अध्यक्ष खत्रीले सामाजिक सुरक्षा कोषमा जाने, आन्तरिक प्रतिस्पर्धा नगर्नेलगायतका माग राखे। ‘राहत दरबन्दीमा कार्यरत सम्पूर्ण शिक्षकहरूलाई पेशागत सुनिश्चिततासहित योगदानमा आधारित सामाजिक सुरक्षा कोषमा समावेश गरी उमेर हदसम्म पेशागत निरन्तरता दिनुपर्छ, कार्यरत सम्पूर्ण राहत शिक्षकहरूको विरामी बिदाको अभिलेख कायम गरी अनिवार्य वा स्वेच्छिक अवकाश हुँदाका बखत आर्थिक सुविधा उपलब्ध गराउनुपर्छ’‚ खत्रीले भने।
त्यसैगरी खत्रीले राहत शिक्षकहरूलाई सरुवा गर्नुपर्ने, दुर्गम भत्ताको व्यवस्था गरिनुपर्ने बताए। आफूहरूले ९ बुँदे माग पूरा नभए असार १५ गतेपछि आन्दोलनमा उत्रिने अध्यक्ष खत्रीले जानकारी दिए। पत्रकार सम्मेलनमा महासचिव जीवन तिमिल्सिनाले राहत शिक्षकलाई शिक्षा सेवा आयोगको खुला परीक्षामा सहभागी हुन चाहने राहत दरबन्दीमा कार्यरत शिक्षकहरूलाई उमेर हद हटाउनुपर्ने बताए।
त्यस्तै समितिका केन्द्रीय सदस्य इन्द्रजित देवकोटाले प्रशासनिक कार्यमा राहत शिक्षकलाई पनि नियुक्तिका आधारमा वरिष्ठता कायम हुनुपर्ने माग राखे। नेपाल राहत शिक्षक राष्ट्रिय समितिको नवौँ र दशौँ पूर्ण बैठकले सर्वसम्मत ‘सम्पूर्ण राहत शिक्षकहरूलाई सामाजिक सुरक्षाकोषमा आबद्ध गरी उमेर हदसम्म पेशागत निरन्तरता दिने’ भन्ने निर्णय गरेर उक्त निर्णय लत्याई सरकारसँग वार्तामा जाँदा ‘आन्तरिक परीक्षाद्वारा सफल भए स्थायी हुने र असफल भए गोल्डेन ह्याण्डसेक लिने’ भन्ने विषय राखेको भन्दै अधिकांश राहत शिक्षकले विरोध जनाउँदै छुटै समिति गठन गरेका छन्।
माग
१. राहत दरबन्दीमा कार्यरत सम्पूर्ण शिक्षकहरूलाई पेशागत सुनिश्चितता सहित योगदानमा आधारित सामाजिक सुरक्षा कोषमा समावेश गरी उमेर हदसम्म पेशागत निरन्तरता दिनुपर्ने ।
२. कार्यरत सम्पूर्ण राहत शिक्षकहरूको विरामी बिदाको अभिलेख कायम गरी अनिवार्य वा स्वेच्छिक अवकाश हुँदाका बखत आर्थिक सुविधा उपलब्ध गराउनुपर्ने।
३ . सरुवाको व्यवस्था हुनुपर्ने ।
४. दुर्गम भत्ताको व्यवस्था हुनुपर्ने ।
५. प्रशासनिक कार्यमा नियुक्तिका आधारमा वरिष्ठता कायम हुनुपर्ने ।
६. औषधि उपचार खर्च सुविधाको व्यवस्था हुनुपर्ने ।
७. शिक्षक सेवा आयोगको खुला परीक्षामा सहभागी हुन चाहने राहत दरबन्दीमा कार्यरत शिक्षकहरूलाई उमेर हद हटाउनुपर्ने ।
८. अनिवार्य वा स्वेच्छिक अवकाश हुँदाका बखत गोल्डेन ह्याण्डसेकको सुविधा उपलब्ध हुनुपर्ने ।
९. अनिवार्यरस्वेच्छिक वा विविध कारणले रिक्त हुन आउने राहत कोटालाई स्वतः स्वीकृत दरबन्दीमा रूपान्तरण गरी खुला विज्ञापनको माध्यमबाट पदपूर्ति गरिनुपर्ने।
